Молитва Киприану и Устинье, как путь к спасению от колдовства

Начинаем глаголати молитву Священномученика Киприана, во дни или в нощи, или в кой час упражняешися, вся силы сопротивнаго от славы Бога Живаго отпадут.

Сей Священномученик, всей душею моляшеся Богу глаголах: «Господи Боже Сильный и Святый, Царь царствующих, ныне услыши молитву раба Твоего, Киприана».

Тебе предстоят тысяща тысящь и тьма тьмам Ангел и Архангел, Ты веси тайное, сердца раба Твоего (имя), предстани ему Господи, яко во узах Павлу и во огне Фекле. Тако, познати мне, Тебя, аз бо первый творях вся беззакония моя.

Ты, держах облак, и небо неодождих древа садовняго, и то плод нетворих. Непраздным женам переждати, и иным зачатия недах. На ограждение пертограда токмо взирах, и нетворих. Розге не цвести и класу непрозябати; Винограду неродити, и зверям неплождатися. Рыбам морским неплавати и птицам небесным летати возбраних. Тако, Ты показал силу Свою при пророце Илие.

Молю Тя, Господи Боже мой; вся чародейства, и вся лукавыя бесы ко греху человека клонях и на нем грех творях, Ты, силою Своею, запрети! Нынеже, Господи Боже мой, Сильный и Великий, благоволивый от недостойного, достойному мне быти, и сопричастному Святому Твоему стаду, молю Тя, Господи Боже мой, кто имать молитву сию в дому или при себе, сотвори ему просящее ею.

Пресвятым Величеством Своим, милосердовах на мне и не восхоте погубити мя со беззакониями моима; тако непогуби всякого молящего Тя молитвою сиею.

Непрочнаго в вере, утверди! Безсильного духом, укрепи! Отчаянного, вразуми и не отверзи всякаго прибегающего к Твоему Святому имени.

Яже, припадая к Тебе Господи, молю и прошу святое имя Твое: во всяком доме и на всяком месте наипаче на православном христианине яже имеется чародейство кое от лукавых человек или от бесов, да прочтется молитва сия над главою человека или в дому и да разрешится от связания злыми духами в зависти, лести, ревности, ненависти, злопомучении, злоустрашении, действенном отравлении, от языческаго ядения и от всякаго заклинания и клятвы.

Кто убо стяжав молитву сию во своем дому да будет соблюден от всякаго ухищрения диавольского, потвора, отравы злыми и лукавыми человеками, от заклинаний и всякаго колдования и чародеяния, и да бежат от него бесы и да отступят злые духи. Господи Боже мой, имеяй власть на небеси и на земли, ради имени Твоего Святаго и ради несказанныя благости Сына Твоего, Бога нашего Иисуса Христа, услыши в час сей недостойного раба Твоего (имя), яже чтет молитву сию и по ней да разрешится вся диавольская козни.

Яко тает воск от лица огня, тако да погибнут вся чародеяния и заклинания лукавския от лица человека чтущаго молитву сию. Яко имя, Живоначальныя Троицы, нам просвещение суть, и разве Тебе, инаго бога не знаем. Тебе веруем, Тебе поклоняемся и Тебя молим; защити, заступи и сохрани нас, Боже, от всякого лукаваго действа и чародейства злых человек.

Яко же Моисеовым сыновам из камени сладку воду источил еси, такожде, Господи Боже Сил, положи руку Свою на раба Твоего (имя), полную благости Твоея и защити от всякаго кознодейства.

Благослови, Господи, дом в нем же да пребывает молитва сия и всякаго чтущаго память мою, Милость Свою пошли ему, Господи, и защити его от всякаго чародеяния. Помощником и покровителем ему буди, Господи.

Четыре реки: Фисон, Геон, Евфрат и Тигр: эдемский человек не может удержати, тако не может никакой чародей ставления дел или мечтаний бесовских являти пред чтением молитвы сия, заклинаю Богом Живым! Да сокрушится демон и прогонится вся противная и злая сила, пущенная от злых человек на раба Божия (имя).

Яко умножил лета Иезекию царю, тако умножи и лета имущему молитву сию: службою Ангел, пением Серафимским, благовещением Пресвятыя Девы Марии от Архангела Гавриила и безплотнаго ради зачатия Ея, Господа нашего Иисуса Христа, славного Рождества Его в Вифлиеме, закланием от Ирода царя четыре на десяти тысящь младенцев и Святого Крещения его воспринятым во Иордановой реке, постом и искушением еже от диавола, ужасныя Его победы и ужаснейшего суда Его, ужаснейших чудес Его в мире бывших: исцеление и очищение даруяй. Мертвых оживляяй, бесы изгоняяй и во Иерусалим вход Его, яко Царя исполняй: — «Оссаина Сыну Давидову — от младенец вопиющих Ти, слышай» Святыя Страсти, Распятие и Погребение терпя, и иже в третий день Воскресению бысть якоже писано есть, и на небеса восхождение. Пение тамо многочисленных Ангел и Архангел, славя восход Его, иже одесную Отца сидения до второго пришествия Его судити живых и мертвых.

Власть дал еси святым учеником Твоим и Апостолом, рекий им: «Держите и держатся — решите и разрешатся», тако и всякому по молитве сей, разреши всякое диавольское чародейство над рабом Твоим (имя).

Ради бо Святаго Великаго имени Твоего заклинаю и прогоняю вси дуси лукавыя и злыя и очеса злых человек и чародейства их наговоры, колдовство, глазную порчу, чародеяния и всякое ухищрение диавольское. Молю Тя, Многомилостиве Господи, отведи от раба Твоего (имя), и от дому его, и от всякаго стяжания его.

Яко же умножил богатство праведному Иову, тако, Господи, умножи домашнее житие имущему молитву сию: созданием Адамовым, жертвою Авелевой, благовещанием Иосифовым, святостию Еноха, правдою Ноя, обращением Мелхисидека, верою Авраама, святостию Иакова, пророчеством Пророков, святынею Патриархов, кровию Священномучеников, закланием Петра и Павла, детством Моисея, девством Иоанна Богослова, священством Аарона, действом Иисуса Навина, святостию Самуила, дванадесятью колен Израилевых, молением Пророка Елисея, постом и ведением Пророка Даниила, проданием Иосифа прекрасного, Премудростию пророка Соломона, силою ста шестидесяти Ангел, молением Честнаго Славнаго Пророка и Крестителя Иоанна и сто на десять Святителей второго собора, святых исповедников и споручников страшнаго несказаннаго имени Твоего Святаго, Всеславного Всевидца Бога, Ему же предстоят тысяща и тьма Ангел и Архангел. Молитв их ради молю и прошу Тя, Господи, прогоняй и одолевай всяку злобу и лукавство от раба Твоего (имя), и да бежит оно в тартар.

Молитву сию возношу Единому и Непобедимому Богу, яко да подобает всем человекам православным спасение в дому том, в нем же имеется молитва сия, еже писана в семидесяти двух языцех и да разрешится по ней всякое лукавство; или в мори, или при пути, или в источнице, или в кладязе; или в верхнем порозе, или в нижнем; или позади, или спереди; или в стене, или в крове, всюду да разрешится!

Да разрешится всякое диавольское наваждение в ходу, или в стану; или в горах, или в вертепах, или в претворах домовых, или в пропастех земных; или в корене древа, или листиях растений; или в нивах, или в садах; или в траве, или в кусте, или в пещи, или в бане, да разрешится!

Да разрешится всякое лукавское деяние; или в коже рыбьей, или в плотской; или в коже змеиной, или в коже человеческой; или в украшениях нарядных, или в уборах головных; или в глазах, или в ушах, или в волосах головных, или в бровях; или в постели, или в одежде; или в обрезании ногтей ножных, или в обрезании ногтей ручных; или в крови горячей, или в воде студеной: да разрешится!

Всякое злодеяние и чародеяние да разрешится; или в мозгу, или под мозгом, или в плече, или между плечами; или в мышцех, или в голенех; или в ноге, или в руке; или во чреве, или под чревом, или в костех, или в жилах; или в желудке, или в естественных пределах, да разрешится!

Да разрешится всякое диавольское действо и наваждение содеянное; или на злате, или на сребре; или на меди, или на железе, или в олове, или в свинце, или в меду, или в воске; или в вине, или в пиве, или в хлебе, или в явствах; во всем да разрешится!

Да разрешится всякое злое диавольское умышление против человека; или в морских гадах, или в летающих насекомых; или в животных, или в птицах; или в звездах, или в луне; или в зверях, или в пресмыкающихся; или в хартиях, или в чернилах; во всем да разрешится!

Аще двух язык лукавых: саламару и ремихару, погоню; елизду и диавола от раба Божьего (имя), силою Честнаго и Животворящего Креста Господня со всеми небесными силами пред Высоким и Страшным Престолом Божиим, твори слуги Своя огнь палящь. Херувимы и Серафимы; Власти и Пристоли; Господства и Силы.

Во един час разбойник вниде в рай молитвою. Молитвою помолися Иисус Навин, солнце ста и луна. Еже помолися пророк Даниил и загради уста львов. Три отроцы: Анания, Азария и Мисаил погаси пламень пещи огненной молитвою. Такожде молю Тя Господи, по молитве сей даждь всякому молящемуся ей.

Молюся и прошу святаго собора пророческаго: Захария, Осию, Иесея, Иоиля, Михея, Исайя, Даниила, Иеремию, Амоса, Самуила, Илию, Елисея, Наума и Пророка Предтечу и Крестителя Господня Иоанна: — молю и прошу четырех Евангелистов, Матфия, Марка, Луку и Иоанна Богослова, и святых Первоверховных Апостолов Петра и Павла, и святых и праведных Богоотец Иоакима и Анну, и Иосифа обручника, и Иакова брата Господня по плоти, Симеона Богоприимца, и Симеона сродника Господня, и Андрея Христа ради юродиваго, и Иоанна Милостиваго, и Игнатия Богоносца, и Священномученика Анания, и Романа певца кондаков, и Марка Греческаго, и Кирилла Патриарха Иерусалимскаго и преподобнаго Ефрема Сирина, и Марка гробокопателя, и триех Святителей Велицых, Василия Великаго, Григория Богослова, и Иоанна Златоустаго, и иже во святых отец наших святителей Николай Архиепископа Мир Ликийских чудотворца, и святых митрополитов: Петра, Алексия, Ионы, Филиппа, Гермогена, Инокентия и Кирилла, Московских чудотворцев: Преподобных Антония, Феодосия и Афанасия, Киево-Печерских чудотворцев: Преподобных Сергия и Никона, Радонежских чудотворцев; Преподобных Зосиму и Саватия, Соловецких чудотворцев; Преподобных Гурия и Варсонофия, Казанских чудотворцев; Иже во святых отец наших: Пахомия, Антония, Феотосия, Пимена Великаго, и иже во святых отца нашего Серафима Саровскаго; Самсона и Данеила столпников; Максима Грека, монаха Милетия Афонский горы; Никона, Патриарха Антиохийскаго, Великомученика Кириака и матери его Иулиты; Алексия, человека Божия, и святых преподобных жен мироносиц: Марии, Магдалины, Евфросинии, Ксении, Евдокии, Анастасии; Святых Великомучениц Параскевы, Екатерины, Февронии, Марины яже проливших кровь свою за Тебя Христа Бога нашего и всех святых отвека Тебе угодивших, Господи, помилуй и спаси раба Твоего (имя), да не прикоснется к нему ни к дому его ни кое зло и лукавство ни в вечерний час, ни в утренний, ни во дни, ни в нощи да не прикоснется.

Сохрани его, Господи, от воздушных, тартарных, водяных, лесовых, дворовых и всякого рода других бесов и духов злобы.

Молю, Тя Господи, яже написася молитва сия святая Священномученика Киприана, утверждена и ознаменована бысть от Святыя Троицы на погубление и прогнание всякого зла, врага и супостата бесовских сетей, ловящих всюду человека колдовством и чародейством Садока и Нафаила нарицаемого Ефил и дщерей Самуиловых, искусных в чародеянии.

Словом Господним утвердися небо и земля и вся еже в поднебесной, силою молитвы сия изгонися всякое вражеское наваждение и потворство. Призываю в помощь вся силы небесные и чиноначалия Твоя; Архангелы: Михаила, Гавриила, Рафаила, Уриила, Салафаила, Иегудила, Варахаила и Ангела хранителя моего: Силу Честнаго и Животворящего Твоего Креста и вся силы и духи небесныя и будет соблюден раб Твой, Господи (имя), и да будет посрамлено лукавство диавольское всею Небесною Силою во славу Тебе, Господи, Создателя моего и во славу Сына Твоего, Господа нашего Иисуса Христа, всегда ныне и присно и во веки веков. Аминь.

Господи! Ты един Всесильный и Всемогущий, сохрани по молитве Священномученика Киприана раба Твоего (имя). (Трижды говорить это и трижды кланяться).

Господи Иисусе Христе Слове и Сыне Божий, молитвою Пресвятыя Твоея Матери и Ангела хранителя моего, помилуй мя грешного раба Твоего (имя). (Трижды говорить это и трижды кланяться).

Вси святии и праведнии, молите Милостиваго Бога о рабе (имя), да сохранит и помилует мя от всякаго врага и супостата. (Трижды говорить это и трижды кланяться).

О святии священномучениче Киприане и мученице Иустина! Внемлите смиренному молению нашему. Аще бо временное житие ваше мученически за Христа скончали есте, но духом от нас не отступаете есте, присно по заповедем Господним шествовати нас научающе и крест свой терпеливо нести нам пособствующе. Се, дерзновение ко Христу Богу и Пречистей Его Матери стяжали есте. Темже и ныне будите молитвенницы и ходатаи о нас, недостойных (имена). Будите нам заступницы крепции, да заступлением вашим сохраняеми невредимы от бесов, волхвов и от человек злых пребудем, славяще Святую Троицу: Отца и Сына и Святаго Духа, ныне и присно, и во веки веков. Аминь.

Избранный от диавольскаго служения на служение истинному Богу и к лику святых сопричтенный, священномучениче Киприане, моли Христа Бога избавитися нам от сетей лукаваго и победити мир, плоть и диавола, да зовем ти:

Радуйся, священномучениче Киприане, скорый помощниче и молитвенниче о душах наших!

Ангельския силы удивишася, како от художества волшебнаго обратился еси, Богомудре Киприане, к познанию Божественному, покаянием обрел еси ангельское безстрастное житие. Мы же, обращению твоему дивящеся, вопием ти таковая:

Радуйся, обращением твоим Ангелов удививый;

Радуйся, лик святых возвеселивый.

Радуйся, мудрость свою показавый;

Радуйся, за Христа венец приявый.

Радуйся, яко тобою беси отгоняются;

Радуйся, яко тобою вся болезни исцеляются.

Радуйся, священномучениче Киприане, скорый помощниче и молитвенниче о душах наших!

Видя Господь, како от лет малых отдан бысть Киприан нечестивыми родители на обучение демонскому служению, восхоте обратити его к Себе, да со Ангелы и всеми святыми воспевает: Аллилуиа!

Разум несовершен имея к вышнему разумению, усердно трудился еси, святе Киприане, изучая демонския лжехитрости, но, познав слабость бесовскую, яко тии боятся Христа, обратился еси к познанию Бога истиннаго. Темже убо тя величаем:

Радуйся, хитрости демонския препобедивый;

Радуйся, прелесть служения его обличивый.

Радуйся, змия лукаваго посрамивый;

Радуйся, христиан прославивый.

Радуйся, мудрых мира сего мудрейший;

Радуйся, разумных разумнейший.

Радуйся, священномучениче Киприане, скорый помощниче и молитвенннче о душах наших!

Сила Вышняго просвети ум твой, блаженне Киприане, егда, не успевше в чародействе против Иустины, беси рекоша тебе: мы боимся и трепещем силы Креста, имже отгоняет нас дева Иустина. Ты же отвещал еси: вы Креста боитеся, но Распятый на Кресте сильней Креста есть. Сего ради пришел еси в храм Господень пети со всеми верными: Аллилуиа!

Имея ум просвещен силою свыше, пришед Киприан к епископу просить крещения, обаче той, убоявся коварства волхва, отгна его. Киприан же тече в храм Господень, и тамо, литургии бывшей, внегда диакон возгласи: оглашенни, изыдите, рече: не изыду из Храма, дондеже прииму крещение. Мы же, твоему вразумлению радующеся, воспеваем ти таковая:

Радуйся, силою свыше просвещенный;

Радуйся, Господом вразумленный.

Радуйся, силу Креста познавый;

Радуйся, демонов от себя отгнавый.

Радуйся, жизнь свою исправивый;

Радуйся, стопы в Церковь направивый.

Радуйся, священномучениче Киприане, скорый помощниче и молитвенниче о душах наших!

Буря помышлений одержа Киприана, како прияти ему крещение. Темже убо прежде, взяв своя чародейския книги, принесе их на средину града и тамо пожже, поя Богу: Аллилуиа

Услышав епископ, яко имаши, всемудре, намерение благое быти христианин, крести тя и постави чтеца во храме. Сего ради вопием ти:

Радуйся, духов злобы победивый;

Радуйся, чародейския книги попаливый

Радуйся, быти христианин возжелавый;

Радуйся, Святое Крещение приявый.

Радуйся, день и нощь с покаянием к Богу взывавый;

Радуйся, епископом наставленный и чтецом во храме поставленный.

Радуйся, священномучениче Киприане, скорый помощниче и молитвенниче о душах наших!

Боготканную одежду Святаго Крещения прияв, Киприане всехвальне, тепле молился еси Богу о прощении грехов, прежде совершенных, от всех христиан воспевая Богу: Аллилуиа!

Видев епископ подвиги и труды твоя, священномучениче Киприане, пост, многонощное бдение, коленопреклонение, покаяние, слезы, молитвы, и по испытании постави тя во диакона. Мы же, благодаряще Бога, восхваляем тя:

Радуйся, подвиги и добродетельми украсивыйся;

Радуйся, о прощении грехов моливыйся.

Радуйся, пример исправления показавый;

Радуйся, слезныя молитвы Господу приносивый.

Радуйся, путь ко спасению познавый;

Радуйся, пламенную любовь ко Христу явивый.

Радуйся, священномучениче Киприане, скорый помощниче и молитвенниче о душах наших!

Образом Благочестия христианскаго подражая деве Иустине, священномучениче Киприане, воистину христианин совершен явился еси, отклонил бо еси нечестивое учение, крестився, и усты своими и чистым сердцем благодарственно воспевал еси Богу: Аллилуиа!

Возсия в сердце твоем свет Божественнаго совершенства, Богомудре Киприане, и достигл еси сана священника, послежде же и епископа. Молим тя, молитвами твоими просвети и наша сердца, тепле молящаяся тебе:

Радуйся, в сан епископа посвященный;

Радуйся, на высоту орла вознесенный.

Радуйся, граде, верху годы стояй;

Радуйся, светильниче, пред Богом горяй.

Радуйся, молитвенниче ко Христу неустанный;

Радуйся, учителю, Богом дарованный.

Радуйся, священномучениче Киприане, скорый помощниче и молитвенниче о душах наших!

Хотя Господь всем спастися, дарова нам сего молитвенника, заступника и целителя от духов злобы поднебесныя. Умением бо и словесы твоими, Богогласе, приводил еси многих к покаянию и исправлению греховныя жизни, научая всех пети Богу: Аллилуиа!

Новый мудрейший врач показался еси миру, священномучениче Киприане, яко молитве твоей чародейския козни противостати не могут, абие разрушаются и прогоняются наведения злых человек и лукавых бесов. Мы же, видяще дарованную тебе Божию силу, вопием ти таковая:

Радуйся, волшебных козней разрушителю;

Радуйся, страшных бесов прогонителю.

Радуйся, от негоже дуси злобы, яко дым, исчезают;

Радуйся, тяжкомучимым скоро помогаяй.

Радуйся, от бед и скорбей избавляяй;

Радуйся, страдания в радость обращаяй.

Радуйся, священномучениче Киприане, скорый помощниче и молитвенниче о душах наших!

Странное чудо является притекающим к тебе с верою, священномучениче Киприане, ибо данною тебе от Бога благодатию беси изгоняются мучащии человека, больнии же исцеляются, взывающии Богу: Аллилуиа!

Всем сердцем возвысивыйся к Богу, преславне, и всею душею Того возлюбивый, имел еси тщание и желание творити волю Его и, яко пастырь добрый, не отринул еси бедами отягощенных, но предстательствуеши в молитвах пред Богом, даруя нам исцеление и утешение. Сero ради, восхваляюще лювовь твою ко Господу, вопием ти сице:

Радуйся, всем сердцем Христа возлюбивый;

Радуйся, вся добродетели стяжавый.

Радуйся, недугующим и разслабленным вспоможение;

Радуйся, в скорбех и печалех утешение.

Радуйся, наветов и искушений, от мира, плоти и диавола находящих, прогонителю;

Радуйся, всех болезней душевных и телесных исцелителю.

Радуйся, священномучениче Киприане, скорый помощниче и молитвенниче о душах наших!

Все Ангельское воинство возвеселися, отче, видя тя, воина Царя Небеснаго, непоколебима и со дерзновением проповедующа Христа, егда веден был еси на мечное усечение вкупе с Иустиною. Ты же, болезнуя о ней, да не отречется от Христа, узревши тя усекнута, глагола ей: да усекнут прежде тя. И, преклонивше под меч главы своя, воспеша Богу: Аллилуиа!

Витии многовещаннии не возмогут по достоянию страдания ваша за Христа воспети, яко не убоялися есте прещений лютых, но со светлыми лики предстали есте судилищу цареву, воздвизающе всех верных глаголати вам сицевая:

Радуйтеся, веры Христовы непоколебимии исповедницы;

Радуйтеся, Пресвятыя Троицы дерзновеннии проповедницы.

Радуйтеся, за Христа души своя положившии;

Радуйтеся, мучения лютая ни во что же вменившии.

Радуйтеся, яко страдания ваша верными прославля¬ются;

Радуйтеся, яко имена ваша в храмех Божиих величаются.

Радуйся, священномучениче Киприане, скорый помощниче и молитвенниче о душах наших!

Спасти хотя души всех одержимых нечистыми духи, не престай взывати присно ко Господу, Киприане Богоглагольниче, тебе бо дадеся благодать молитися за ны, да помиловании и очищении, воспоем Богу: Аллилуиа!

Стена тверда и крепкая ограда буди нам, священномучениче Киприане, с теплою верою и любовию к тебе прибегающим, ограждаеши бо от враг видимых и невидимых, избавлени тобою, прославим тя тако:

Радуйся, духа злобы смирением поведивый;

Радуйся, огнем молитвы стрелы вражия попаливый.

Радуйся, от врагов видимых и невидимых стено и ограждение;

Радуйся, Православныя Церкве преславное украшение.

Радуйся, оставленных врачи предивное поможение;

Радуйся, прелюбимое скорбящим утешение и увеселение.

Радуйся, священномучениче Киприане, скорый помощниче и молитвенниче о душах наших!

Пение непрестанное Пресвятей Троице паче иных принесл еси, священномучениче Киприане, Иже милости ради к падшим грешником благоволи недостойным достойным стати и сочислитися святому стаду. Мы же, благодаряще Бога за таковую милость Его к нам, грешным, зовем Ему: Аллилуиа

Светозарная свеща был еси, Богомудре, в Церкви Христове, просвещая невещественным светом души верных. Молимся ти, просвети и наша грехми омраченная сердца, во еже пети тебе таковая:

Радуйся, Трисиянным Светом озаренный;

Радуйся, к сонму святых сопричтенный.

Радуйся, яко светом невещественным души верных просвещаеши;

Радуйся, яко заблуждших на путь правый наставляеши.

Радуйся, из рова погибели, яко овча, Спасителем изъятый;

Радуйся, бесов посрамление и человеком радование.

Радуйся, священномучениче Киприане, скорый помощниче и молитвенниче о душах!

Благодать дана ти от Бога попирати силу вражию и всякое сатанинское нахождение, победил со еси враги твоя и мученическим подвигом запечатлел еси веру во Христа. Ныне же, предстоя Престолу Царя славы, молися, Киприане всеблаженне, да избавимся от пленения диавольскаго и воскликнем Богу: Аллилуиа!

Поюще твою верность по Бозе и дивная преславная чудеса, величаем и восхваляем тя, священномучениче Киприане, приял бо еси от Бога таковую благодать. Темже молим тя: егда в час смерти нашея демонская полчища обыдут души наши, яви нам заступление твое, да избавлении тобою, воззовем ти сице:

Радуйся, от находящих вражиих сил скорое защищение;

Радуйся, от всевозможных скорбей и печалей избавление.

Радуйся, Христа до конца возлюбивый;

Радуйся, душу свою за Него положивый.

Радуйся, в крови Агнчей омывыйся;

Радуйся, во дворех Господних вселивыйся.

Радуйся, священномучениче Киприане, скорый помощниче и молитвенниче о душах наших!

О пречудный и преславный угодниче Божий, священномучениче Киприане, скорый помощниче всем к тебе прибегающим, приими от нас, недостойных, хвалебное пение наше. Ей, молим тя, святителю, от многообразных недугов исцели, от враг видимых и невидимых заступи и вечнаго мучения избавитися нам Господа умоли, да с тобою воспеваем: Аллилуиа, Аллилуиа, Аллилуиа!